Тыдзень роднай мовы стартаваў у Беларускім дзяржаўным тэхналагічным універсітэце. Пачаўся ён з конкурсу чытальнікаў “Каласы роднай мовы”, праведзенага 16 лютага 2017 года дацэнтам кафедры беларускай філалогіі Федарцовай Тамарай Мікалаеўнай у 7 групе факультэта ХТіТ і 6 групе факультэта ТАР.

Шчыра і натхнёна гучалі вершы беларускіх паэтаў пра мову, Радзіму і хараство роднага краю. Першае месца студэнцкае журы аднагалосна прысудзіла Ірыне Куліш за майстэрскае прачытанне верша Максіма Танка “Слімак”. Пераможцам у намінацыі “Уласныя творы” стаў Аляксандр  Маргелаў, які прэзентаваў мастацкую замалёўку пра сваю малую радзіму  аграгарадок “Новыя Саматэвічы”. У рабоце аўтар падкрэсліў, што, хаця радзіма Аркадзя Куляшова, вёска Саматэвічы, і засталася ў зоне адсялення, людзі ў гонар знакамітага земляка адрадзілі гэту назву на новай тэрыторыі.

Сярод лепшых чытальнікаў вызначыліся таксама Дар’я Міхасёва, Кацярына Семянькова, Глафіра Атрошчанка, Ганна Ясюкевіч, Дзмітрый Пінчук і Дзмітрый Лабковіч

Затым студэнтам была прапанавана цікавая віктарына “Жыву ў Беларусі і тым ганаруся”. Пераможцамі сталі Надзея Петух і Васіліна Садомава.

Са студэнтамі 6 групы факультэта ТАР была праведзена таксама гульня “Апрані і накармі ляльку”. З гэтай мэтай  былі створаны дзве каманды. Каманда юнакоў з напісаных на дошцы найменняў выбірала беларускія старадаўнія і сучасныя стравы, а каманда дзяўчат – вопратку. Гульня падарыла студэнтам шмат вясёлых хвілін і сапраўднага задавальнення, а таксама дала магчымасць пашырыць свой слоўнікавы запас.

Усе  пераможцы былі адзначаны салодкімі прызамі.